寒風

6 月 5 號就上 sex & the city 電影版喇～ 我一向都好鍾意睇的，以前明珠台做的時候就一定睇完先肯訓，但有時去左街未返就會 miss 左... 而且我唔係由第一輯就開始睇，所以想趁佢上畫之前溫吓書先（讀書有咁勤力的話我阿媽開心屎咯...）。就係咁我同阿 paul 就一個禮拜租一個 season 返去煲（大約有 4-6 隻 dvd，18 集到啦），而家已經差唔多煲完 season 3，照呢個進度的話上畫時應該都未溫哂 一_一"

但 sex and the city 同神探阿 paul 到底有咩關係呢？其實係冇的！

只係尋晚我地睇睇吓的時候有人突然黑面 -_ 打爛個沙盤之後先發現原來有人扮神探但冤枉左好人（大家唔好怪佢，可能佢呢排睇法證睇上腦）

車：妳有冇野呃我？
我：（無辜樣）吓？呃妳咩呀？冇喎！
車：妳自己講有咩呃我！
我：（Ｒ哂頭）真係冇喎！
車：妳尋日（即28晚）做咩搵餐廳搵到咁晏先走？
我：咪話想比阿姐揀埋先走丫嘛！
車：哼！咁妳今日同邊個食晏？
我：winnie 囉！
車：去邊到食？
我：food court 囉～（落雨嘛，同埋諗住有得比八達通唔使排隊"咁"錢）
車：食到幾點？
我：點半到啦～
車：哼！大話精！
我：吓？
車：咁妳同同事食飯點解佢會打比妳架？

我睇返個電話同事大約一點的時候真係打過比我，但我尋日的 lunch 實在太多電話搵我太煩搞到我都完全忘記左佢搵我做乜！後來先醒起原來佢係喺我"咁"緊錢的時候打比我話我知原來有得比EPS！

唉～ 神(經)探呀～ 神(經)探～ 下次搵足ｄ料先落我簿丫～ 係香港疑點利益歸於被告架嘛！

現在的狀況就像是站在淤泥中，想走卻又走不得。我是由何時變成今天的樣子呢？於是，用了一個午餐來換了一束出淤泥而不染的牡丹回來氹氹自己開心。

將相機調回 high quality 後，要２Ｍ一張，但真的靚好多哦！

一直都未打第 3 日的遊記係一來係因為連相都未 upload... 二來就係根本完全冇時間...

收埋左係個喼到的屎姪仔今晚終於都可以出來見人喇！祝妳生日快樂

今日行程：大溪花海 → 西門町

今日的行程比較簡單，因為一來一回大溪都要４個鐘。

又因為之前一日有人唔知醒而令到成日行程 delay，臨訓前千叮萬囑個慢世磨王要準時起身～ 但食完早餐去到台北車站都 10 點喇又！即係冇早到囉... 不過都好彩趕得切 10:15 的電車（都係台鐵，不過係最慢個隻）去桃園，如果唔係就有排等（下晝 4 點...）喇！台鐵的買飛同搭車程序都幾複雜啊，首先火車都有四種，又咩自強號、復興號，有快有慢，偏偏我地搭中最慢的電車，唔識自助買飛的就要去排人肉售票處喇；站又冇寫係南行定北行，又要問人；上到車又冇顯示路線站名等任何資料... 地圖又冇火車的路線... 真係灰爆！我地唯有靠聽「下一站是...」

去到桃園火車站，問完又問先去到桃園客運站轉公車去大溪，再等多半個鐘先有公車去慈湖，幾轉折先得架！小插曲第一段：上公車比錢時我地懶醒拎張悠遊卡出來 doo，但 doo 極都唔得，後來司機先發現我地嗰張係台北的悠遊卡，桃園原來又有自己一張架！同埋呢到ｄ公車好鬼盞鬼，上車時佢地會問妳去邊，分段收費之餘，司機叔叔會比張印住妳落車站的卡／飛妳，落車的時候要比返司機。幾經辛苦，我地終於來到大溪花海農場喇！小插曲第二段：比完入場費上到去遊客中心先發現原來呢到用得 youth pass 架！大拿拿蝕左五十個大洋之餘仲比人ｙｏ到體無原膚！

一來到見到咁多花花，阿 paul 好開心啊！係咁要呢到影嗰到影！真係有好多人專程來影結婚相，又見到有香港旅行團舒舒服服咁來... 我地真係唔好彩！薰依草季已過，取而代之的係差唔多樣的鼠尾草，呵呵！我地梗係唔識分啦！有水牌架嘛！:P

呢到仲有個小農場，有隻馬仔仲識得叫阿 paul 開水喉比佢飲水水，氹得阿 paul 鬼死咁開心！之後我地仲買左ｄ甘荀條比佢地食～

影左個零鐘就走喇，趕住去搭回程車返大溪，個幾鐘先一班，唔可以 miss！由大溪返台北的時候，我地決定唔再坐火車而轉搭公車！勁呀！總站到總站，我地訓到頸都梗埋！但我地 charge 足電咁落車哦！行一個街口就到西門町喇～ 中途仲經過我地想住又住唔到的寶格利酒店，佢地的房好似ｋ房咁架！笑死人！好想住吓哦！由於要趕車的關係，我地冇係大溪食野，出到來就勁肚餓！阿 paul 又唔想佢的生日大餐係掃街咁過，同埋我地要借廁所！所以我地就去左食蛋蛋屋～ 其實同麻布真係差唔多之嘛，點解妳唔肯同我喺香港食喎？！食完飯都未夠 6 點，一落到樓下台灣同事 amber 就打來說看看我們了... 本來的二人世界就泡湯了...

但我地都好開心咁一齊行左好多地方哦！有恨左好耐的愛的紋身，糊 pat pat 阿宗面線，m 巾綿花糖，好貴的老天綠，玩到傻的貼紙相... 最後 amber 都唔夠我地金霸皇，要先行打道回府了～ 我地再行左一陣誠品116（係百貨公司來），之後再買埋魯味同超好味的臭豆腐就打的返歸了！途中經過總統府，阿paul 問我點解我地冇去呢到... 好無辜哦！今次呢個司機好好人，佢見有個傻婆好興奮咁係架車入面影出去總統府，就專登揸慢ｄ同綠燈都等佢影埋先開車。

我想... 生日可以來到台灣，去到這個美麗的花海，妳會開心滿意的...
（所有相片後補）

恭祝妳福壽與天齊
慶賀妳生晨快樂
年年都有今日（咁肥？個市又跌...）
歲歲都有今朝（炒飯來喎...）
恭喜妳～恭喜妳～

Pinky 話妳／你知：做書考試要攞Ａ，出來做野更加要Ａ！仲要有技巧咁Ａ！！！

事頭走的時候對我說的話，我仍銘記於心，所以我比過往包容、付出。但我一直心存懷疑，到頭來，我的結局會否同事頭一樣？

好一些的人見妳付出，人家可能會暗暗欣賞，但不會有 bonus；妳有難的時候或會隔岸觀火。
差一點的人見妳付出，便會乘虛而入得寸進尺，自己喊都無謂；妳有難的時候更會雪上加霜！

或許我用上一生的時間都得不到這個Ａ，某程度我亦不恨自己成為一個Ａ君，只望我生命中出現多些有承擔的人。

今日行程：故宮博物院 → 汪汪瞄瞄館 → 陽明山竹子湖 → 師大夜市

原本仲打算去埋士林官邸影相睇花既，可惜有人慢磨磨...

◎travelling like rock star　　◎未訓醒的車厘　　　　◎出發喇！

每次搭車都比人呃... 今次有個阿姐話比我地知有公車可以由台北車站去故宮博物院，但我地搵哂全部站同問人都搵唔到囉～ 途中行過間星巴克，諗住入去拿拿鐵吊吊命，點知阿姐姐就 sell 我地有隻新口味今日先出，唔知香港有未，係個譯名無虫溪考佢係咩味，飲落就香香地囉～ 所以都叫左，但返到來先發現香港都出左囉～ 仲要係超普通的焦糖味... 一_一" 最後我地都係坐捷運到士林站再轉公車。

去到市林，都１０點有多，去唔到士林官邸喇，就直去故宮博物院囉！唔知係咪因為呢條係旅遊線，車上有顯示咩站之餘，司機仲會開咪講，但回程的時候個司機 lur 哂利都唔知佢 up 乜... 故宮博物院唔比影相架，所以我地都好乖，只係係門口影左咋！

　　　　　◎仲拎住杯野　　　◎掛返上去冇耐的「天下為公」◎用youth pass買的半價票

一入到去，就有個不速之客！乞我憎！冇炒飯不過勁黑面！但我地真係逐樣野睇， 本來只預左個半鐘，再驚覺的時候好似已經成點... 為左下一個行程，未睇哂都要走喇！搭返車出去士林，我地就行返去汪汪貓貓館喇～ 唔好以為係咩博物館，其實只係幾間連鎖店，主打賣ｄ瞄呀犬呀咁的野，分本土貨同日本貨，唔鍾意寵物的可以唔入，不過士林站一出就係～ :P 買左少少手信就去食午餐，唔肚餓都要食，因為唔知上左山仲有冇野食！

不過今日個午餐就出事喇！汪汪貓貓館的對面馬路係一家好地道的菜館，賣魯肉飯，炸雞等，見人上我地又上... 唉，大家睇吓↓

係咪都幾好樣呀？呃得吓人架！

借廁所個時已經有ｄ嚇人，拎埋筷子匙就更覺出事（其實間間都係咁的，唔使驚～），個咖哩一入口就 一_一 個魯肉飯都 ok 架，件魯肉一ｄ都唔覺油，仲幾爽口！不過如果有人睇過大陸竹荀的 email 的話，我估妳／你都唔敢放ｄ荀入口！其實我有試過，咬唔開之餘仲真係傳來陣陣木筷子味陪住妳成餐飯！問妳死未？！鋪頭隔雜的野飲亦可免則免，食完餐飯都未行到去巴士站我已經肚痾喇！！！！！由於呢餐飯都唔係幾滿足，阿 paul 又成日想食台灣的餃子，我又要借廁所，所以我地走左入呢間「八方雲集」

放心，呢間係集團式經營，完全冇事，好穩陣！放心食啦！不過要提提大家數量個欄係真係代表幾多隻，我地寫１ｄ人簡直覺得我地係外星人！

食完再食就拿拿淋上山啦！兩點喇！off 哂 schedule！上到陽明山公車站再轉泥鯭的上竹子湖，仲有咩人上釣？佢地係一 pair 韓國交流生，來台灣讀書，ｄ國語好過我地多多聲！（慚愧嗎？）

上到去行少少就會見到好多個場，個個都開滿哂海芋花（即我地的馬蹄蘭），仲有得親自入去採添呀！！

除左白色之外仲有粉紅，藍，紫同黃，不過係噴的，放低百零蚊台幣老板好樂意任妳噴～ 我地影完一大輪相之後又要去廁所，即係又到左食野時間...... 今次我地食左炸茄子，炸地瓜同出名的７彩饅頭！

食飽就去做採花賊～ 好抵好靚噢！！NT$100 就有 10 枝喇！仲未計比我地整斷個ｄ呢！玩完行多一陣就要去等尾班車（１７３０）落山喇！除非想再搭泥鯭的啦！落返陽明山公車站再轉任何一架去到捷運站的公車再轉多次捷運加的士就返到酒店喇（幾轉折先得架...）等埋 amber 來搵我地之後就去師大夜市再食過喇喂！