寒風

琴日已經有通知話今日會有 NY 的同事會來，book 定 projector 或大 conference room 先。

但我唔知邊個來，亦唔知來做乜…

今天，他們臨入去 training 的時候，AL 走過來問我有無興趣 / 時間，佢覺得我有需要聽，話老師問的話，我會識答，唔使一定要再問 Sales Rep。都好，不過預左成朝無得做野。Ken 批准左之後，vvvv 就問：「你要聽，咁我使唔使聽呀？」 下？我點知你呀？！不如你問你老細啦… =.=''' 之後佢又再佢問 AL 佢使唔使聽，小姐呀… 人地都無叫你，會唔會即係唔使呢？好心唔好扮 innocent 啦！雖然我知呢個係你強項！最後，唔知邊個問 Ken，點知佢答：「唔使啦！佢聽來都無用…」XD！！！

Marketing Co-ordinator 無得聽，AA 反而要… 可喜可賀… 你的存在，就是顯得我有用… 你越得閒吹水，我就越忙~ 吹飽佢，免得你一陣又不安、好大壓力、唔知點好… 亦免得你做錯野我要執你手尾…

但今日，我承認我做錯了… 我唔應該打比你叫你一齊食 lunch… 我諗佢 total 食左 2 個半鐘頭 lunch。做乜扮好人呢？低 b 左啦！

仲有今日 lunch 尾聲時，上演了一段小插曲。有個女人無眼淚的（在蘭桂芳某餐廳內）大叫大哭，並死「車」住個男人件衫，件衫係變哂型，但仲未爛！有 2 個 waitress 嘗試去「勸」這個女人出去，但個女人就死唔走，個男人又唔郁，亦唔覺佢郁左會幫到個 movement！Manager 見到勢色唔對（我地全台 8 個人都望哂過去）就加入戰團，強行拉對男女出餐廳。大家一定想像唔會個女人有幾唔想走，佢隻腳係死要撐唔個地唔走，個 ger 加被拉住的男人就同佢鬥大力拖個女人出去。我地臨走的時候，個 ger 仲同我地講：Enjoy the show！+.+ 八掛的我地就繼續搵下對男女去左邊，continue the show，比我地發現，但女仔繼續無眼淚咁大叫大喊咁「車」住個男人件衫！

我地唯有驚嘆點解個男人件衫仲未爛…

Ken 話：佢咁想要件衫就除比佢啦！
FW 話：佢地一定係分手！談判破裂，所以個女仔發癲（仲要真人示範個 Manager 有幾大力咁拖個女仔出去…）
我話：但點解佢死唔肯走呢？不過佢咁搞法個男仔米仲唔鍾意佢… 都傻的…
FW 回應：佢都失去理智啦！佢識咁諗就唔會o係到鬼叫啦！
係喎… 你有道理…

香港人係米真係好大壓力？這次是我一個月內見第三個女人當街當巷大喊了… 地點分別在金魚街馬路中心，CWB United Colour of Benetton 門口 和 LKF。

我唔希望會係下一個。