寒風

舊年的月餅節，妳摘了兩粒又圓又大的星星給我～ 可是最後都是炒飯收場...

今年一覺醒來就炒飯炒到黑...... 好不容易食完個晚飯就嘭嘭聲去會我的情人，但一個半小時的獨處就足夠令妳打回原型了！我都知我要妳受了委屈了... 妳又知道我的心情也不好受嗎？返到西環，同妳食左個「團圓飯」之後就上左樓，諗住煮幾粒湯圓比妳 sweet 一下，又想應一下節。可惜都煲好了薑水後才發現湯圓已經過期了足足一年！囧！照煮無誤啦都係... 不過煮完就真係白廢心機啦！裡裡內內都係唔食得的～ 不過阿 paul 醒目，冇熱辣辣的湯圓就改為新潮的雪米糍啦！

食完冇咩好做就去睇吓兩隻豬啦！玩左一陣都夜了，我地就諗住轉戰維園啦！點知有知情人士透露只係得幾盞燈泡，冇咩好睇！所以我地就諗住去赤柱聖士提反灣喇！沿路我隨左睇地圖之外，就係咁係到啪左ｄ螢光棒啦，本來都冇咩事的，但去左赤柱，我啪完枝螢光棒就 fing 兩 fing 啦，點知阿 paul 話我 fing 左 d 野去佢到，我都冇為意，所以就搵 tissue 抺吓枝螢光棒，係咪真係漏螢光濟。但阿 paul 拍完架車就即刻話隻眼好乸！個時真係嚇到我手足無惜！用水沖左一陣眼之後就即刻去瑪麗，不過想快都快唔到，唔係因為我揸車，而係因為個條係單程路，前面有車快唔到！

係車程到，我冇野可以做到，一來我係罪魁禍首，二來見到阿 paul 個樣咁辛苦，三來見面ｄ車又慢吞吞！我真係好心急！唯有係呢段時間到做到我認為自己可以做的野，搵瑪麗醫院的電話，睇吓有冇得報定案，等我地去到有得即刻睇！點知急症室聽電話個人淨係識得講：一定要來到先可以登記！（冇語氣冇尾音！）我同佢講左成件事有幾緊急，佢都淨係識得同我講同一句說話：一定要來到先可以登記！個時我真係好想投訴佢！！！！！！！就算手續真係要我個人來到先可以登記的，呢位小姐都絕對可以用好十倍的語氣同我講野！我唔認為緊急就唔會打來問啦！係得醫院做，除非我係生仔啫，其他都唔會係好事來架啦！都唔可以用ｄ好ｄ的語氣去對妳的「客人」？所以我鍾意去養和不無道理！都係貴一般私家醫生少少，態度好十倍，即使衰起上來都一定投訴有門！！！

唉！扯太遠了！因為螢光濟入眼都真係幾大件事，所以分流完護士已經即刻安排洗眼。因為我唔入得去，所以唔知「手術室」入面發生咩事，只可以係出面乾等！（如妳所講，就好似等生仔一樣咁緊張心煩吧！）過左唔知幾耐，隔離床個個好彩侍應都補完針出來了，我就望入去見到姑娘幫妳洗緊眼，不過門好快又閂埋了。又再等左唔知幾耐，妳終於都出來了，我問妳點呀？仲有冇乸同痛呀？妳就哇啦哇啦咁喊左出來了... 我知妳係入面受苦了，都係我害的！姑娘叫我地等一陣，比醫生見完再睇吓使唔使再沖眼。醫生檢查完確定冇傷到眼角膜，不過要再洗眼，洗到個酸鹼度正常返；同埋要睇吓阿 paul 睇野清唔清楚。不過阿 paul 的 lasik 真係做得好好！佢係咁的情況下睇的野仲清楚過我！！！（定係我個醫生做得太差呢？）就係咁，又等左一陣，阿 paul 就要返入去刑場再洗眼了！今次見到姑娘仲要去隔離的留院觀察病房到攞鹽水... 我真係對妳唔住呀！！！

洗左十包後，終於都「回復正常」了！醫生再檢查一下，拎埋醫生紙比埋錢就返西環了。搞一搞已經零晨三點，阿 paul 負傷冇可能揸返屯門，而我揸比負傷的阿 paul 揸更危險吧？所以都係返西環食ｄ野就瞓啦。上到床，阿 paul 同我講：我地今年都冇好好咁望吓個月光。

唔緊要啦！妳咪係我個月光囉！日日都係我個心入面架啦！

我的車厘是月亮，初一十五都一樣～

只希望下一年的中秋平凡一點，溫馨一點就夠了。。。